“HOLAN HATA DO HOLONG NI AMANTA I”

Dung tarhira onom bulan manjalo pasupasu parsaripeon di Jakarta mulak ma sepasang Pangoli dohot Oroan tu hutanasida. Asa anggiat tumangkas ditanda angka keluarga dohot sisolhot ni pangoli i inanta i. Mansai dao do sian ibukota kecamatan hutanasida i pola lobi 10 Km. Angkup ni i martingki do angkutan umum masuk tu hutanasida jala olat ni pkl 17.00 (botari) wib do, dungkon ni ndang adong be kendaraan umum nda ingkon mardalanpat nama. Songoni ma tongon nunga mareak pungkul 17.30 wib Pangoli on na margoar si Landong dohot Inanta i na margoar Sorta sahat di ibukota Kecamatan i. Asa ingkon mardalanpat nama nasida laho mampareahi hutanasida sian ibukota ni Kecamatan i. Ala so adong be kendaraan umum dipangido inanta i do asa marborngin tagonan nasida di ibukota Kecamatan i paima adong motor marsogot laho tu hutanasida i. Alai gogo do si Landong paposhon roha ni si Sorta soripadana i paboa na so pola mahua nasida di pardalanan. “Tung loasonhu ma ho hasian marmara?” ninna amanta si Landong. Didok dope tahe hata na asing: “Ho do haholonganhu, molo manang mahua ho na tumagon mate do ahu!” Angkup nii didok dope: “Pos roham maradu hosangku huseahon laho manjaga ho, beta ma inang soripada na ulilagu, haholongan!” ninna. Ragam dope tahe dipandok amanta si Landong angka hata na paposhon roha ni inanta si Sorta. Tutu gabe pos do roha ni inanta si Sorta umbege angka hata ni amanta si Landong, na pola rade ibana hape sahat tu hamatean holan laho mangondihon nasida. Saut ma nasida manguduti pardalanan mampareahi huta ni amanta si Landong. Tung rosu (mesra) ma tahe idaon nasida na mardalan i. Halak na marnida pe pintor diantusi do na pengantin baru do nasida tongon. Molo tongon mamolus dalan na marlubang manang margambogambo pintor hatop do amanta si Landong maniop tangan ni inanta i laho manogu, atik pe boi do nian dalanan ni inanta si Sorta dalan i. Sandok godang ma dibahen amanta si Landong dalan laho patuduhon holong ni rohana. Sipata dipapujipuji inanta i, sipata songon na dihaol, sipata songon na digalmit, d.n.a. Dung tarhira 5 Km bongot ma nasida tu dalan na lungun manang langlang. Ala naung mareak botari, nunga songon na lam holom, angkup nii ragam soara ni binatang sian tombak na humaliang i pe nunga masipatubege soarana be. Songon na mabiar inanta si Sorta ala ndang hea ditagam rohana songoni hape lungun ni dalan tu huta ni amanta si Landong. Amanta si Landong pe sasintongna nunga mamungka dohot mabiar, alai sai diuji ibana do tongtong mangapoi inanta soripadana i. Ndang apala sadia lelengnari tompu ma tarbege sada soara na asing sian tombak i, songon soara ni binatang na mangorong. Dipamanat nasida hira soara ni gompul na maotaot do i. Pintor dipaso ma pardalannasida jala laos ditailihon nasida humaliang inganan i. Tahutan ma inanta si Sorta huhut humitir simanjojakna jala ngali sandok pamatangna ala ni biarna. Amanta si Landong pe ndang manghatai be, nunga manghohom, ndang diboto ibana be manang aha sidohononna tu inanta i. Nunga tung dohot ibana tahutan jala humitir huhut mamparrohahon humaliang. Sasintongna ndang parmaraan i na naeng anahononna alai na mangalului hau do bahen panjangkitanna aik beha tompu sahat gompul i di jolonasida. Tutu do surasura ni roha ni amanta i ndang sadia leleng pintor jongjong ma sada gompul na balga di jolonasida mangorong naeng mamolgak. Pintor hatop do amanta si Landong mangangkat laos manjangkit sada hau na jonok tu hajongjonganna i. Dihudus ibana manjangkit. Alai ala ni biarna sipata sai runsur do patna sian hau i. Dung sahat ibana di ginjang dihaol ibana ma mansai gomos bona ni hau. Alai ianggo inanta si Sorta sai tumatangis ma sahalakna di toru patagamtagam mara. “Unang tadinghon sahalakhu, amang paloasonmu ma hape mate ahu allangon ni gompul on!?” ninna inanta i huhut tumatangis. “Ondihon ahu amang!!!” ninna inanta i muse. Alai hohom do amanta si Landong huhut dipagomos sitioponna tu hau i. Ndang sadia leleng, huroha ala nunga malitondi gabe pingsan ma inanta i laos peak di tongandalan i. Nangetnanget ma ditailihon amanta si Landong tu toru manang songon dia na masa tu inanta i. Dibereng ibana ma dipajonok gompul i tu inanta si Sorta naung peak i. “Haratonna ma huroha,” ninna rohana. Dipajonok gompul i ma babana tu sipareon ni inanta i. “Inang, tung pinggolna i do huroha parjolo haratonna,” ninna surasura ni rohana. Alai dung dipamanat ibana ndang marnadiallang gompul i sipareon ni inanta i, baliksa gabe sai hira na marhusip do gompul i tu inanta i. Dung hira sadia leleng memang gabe ditinggalhon gompul i do inanta i di ujungna. Dung pos roha ni amanta si Landong naung dao gompul i dibaranihon ibana ma tuat sian hau panjangkitanna i. Pintor dihalaputi ma mandungoi inanta si Sorta sian na pingsan i. Dung hira tarjolma inanta i pintor dihaol ibana ma muse nasida dalan patuduhon balga ni rohana ala malua sian parmaraan bolon. “Mauliate ma di Tuhanta, ndang manang dihahua gompul i ho hape inang boru ni raja!” ninna ibana. Inanta i pe mansai las situtu do rohana dung diboto ibana na malua sian parmaraan i. “Tung pulut do antong roham manadinghon ahu di parmaraan i!” ninna inanta i. Gabe minta maaf ma amanta si Landong tu inanta i. “Alai manang boha pe mauliate ma di Tuhanta ala dipalua do ho sian parmaraan i, i do na rumingkot. Minta maaf ma jo ahu da inang,” ninna amanta si Landong. Dungi disungkun amanta si Landong ma inanta i; “Alai aut nii ma jo tahe, hurimpu do na parjolo sipareonmi allangon ni gompul i nangkin. Ai hubereng sai tusi do nangkin dipajonok ibana babana i. Hape gabe sai hira na marhusip do gompul i nangkin tu ho. Na adong do dihusiphon gompul i tu ho, inang?” ninna amanta i. “I do, adong do dihusiphon gompul i tu ahu nangkin, alai ndang pola ringkot botoonmu i,” ninna inanta si Sorta. “Ho nian, paboa ma jo inang asa huboto aha do dihusiphon gompul i tu ho nangkin,” ninna amanta si Landong mangelek. Ala nunga sai dielek gabe didok inanta si Sorta ma. “Alai molo hupaboa aha dihusiphon gompul i unang hansit roham da!” ninna inanta i. On do dihusiphon babiat i tu ahu nangkin: “HOLAN HATA DO HOLONG NI AMANTA I TU HO, INANG!!!” ninna inanta si Sorta. Umbege i gabe maila ma amanta si Landong, ai tung apala sintong situtu do na nidok ni inanta i. Anggo hatana saleleng on maradu seahononna hosana laho patuduhon holong ni rohana tu inanta si Sorta, hape hataridaanna NIHIL alias HOLAN HATA. Nian ndang mungkin marhusip gompul i tu inanta i alai ianggo holong ni amanta i na HOLAN HATA tu inanta i tutu do i. Didok hata ni Debata: “Hamu angka anaha, unang ma hatanta dohot dilanta mangkaholongi; naeng ma marhitehite pambahenan dohot hasintongan.” (1 Joh 3:18)